სანამ ძეხვს იყიდით, კარგად დაფიქრდით, ღირს კი მისი ჭამა. რატომ?

მომხმარებელთა ფედერაცია ჯანმრთელობისთვის საშიში ძეხვების ნუსხას ავრცელებს: „ზეიკიძე“, „მოსკოვური“, ნახევრადშებოლილი, სუჯუკი, ბასტურმა, შპს „ეკომოთის“ ნახევრადშებოლილი, დიდუბის მოსკოვური და რუსთავი. მომწამვლელი პროდუქტების ჩამონათვალიდან, „ზეიკიძისა“ და შეზღუდული პასუხისმგებლობის საწარმო „ეკომოთის“ გარდა, ყველა ძეხვის წარმოშობა უცნობია. მომხმარებელთა ფედერაციის ხელმძღვანელი მადონა კოიძე აცხადებს, რომ მრავალგზის მცდელობის მიუხედავად, ჯანმრთელობისათვის საშიში ძეხვეულის დამამზადებელ საწარმოებს ვერ მიაკვლია. მომხმარებელთა ფედერაციამ თბილისსა და რეგიონებში შეძენილი ნაწარმი შეამოწმა. დადგინდა, რომ პროდუქცია საკვებად უვარგისი და ჯანმრთელობისთვის საშიშია, მასში მრავლად არის პროტეუსის ბაქტერიები, რაც კუჭ–ნაწლავის სისტემის მძიმე ინფექციურ დაავადებებს იწვევს.