კომერციული ბანკების საკრედიტო დაბანდების მოცულობა ოქტომბერში წინა თვესთან შედარებით, 0.9%-ით ანუ 68 მლნ ლარით გაიზარდა და 1-ელი ნოემბრისთვის 7.5 მლრდ ლარს მიაღწია .
ეროვნული ბანკის ინფორმაციით, ოქტომბერში ეროვნული ვალუტით გაცემული სესხების მოცულობა 1.6%-ით, ანუ 35.2 მლნ ლარით გაიზარდა, ხოლო უცხოური ვალუტით გაცემული სესხების მოცულობა - 0.6%-ით, ანუ 32.8 მლნ ლარით.
რეზიდენტი იურიდიული პირებისთვის ოქტომბერში კომერციულ ბანკებს ეროვნული ვალუტით გაცემული ჰქონდათ 778.8 მლნ ლარის, ხოლო უცხოური ვალუტით - 3.4 მლრდ ლარის მოცულობის სესხი.
იურიდიული პირების დაკრედიტების მთლიან მოცულობაში ყველაზე დიდი ხვედრითი წილი - 49.3% ვაჭრობის სფეროზე მოდის. სექტემბერთან შედარებით, ოქტომბერში ვაჭრობის სფეროზე გაცემული სესხების მოცულობა 1.4%-ით ანუ 27.9 მლნ ლარით გაიზარდა და 2.1 მლრდ ლარს მიაღწია.
ოქტომბერში მრეწველობაზე გაცემული სესხების წილმა იურიდიულ პირებზე გაცემული ვადიანი სესხების საერთო მოცულობაში 19.6% შეადგინა, რაც 1-ელი ნოემბრისთვის 823.3 მლნ ლარით განისაზღვრა; 11.8% მოდის მშენებლობაზე, რაც 498.4 მლნ ლარია.
2011 წლის ოქტომბრის განმავლობაში 2.1%-ით ანუ 61.3 მლნ ლარით გაიზარდა რეზიდენტი ფიზიკური პირების დაკრედიტების მოცულობა და მიმდინარე წლის 1-ელი ნოემბრისთვის 3 მლრდ ლარს გადააჭარბა.