ბანკ "ქართუს" გენერალური დირექტორი ნოდარ ჯავახიშვილი ვარაუდობს, რომ ეროვნული ბანკი "ქართუში" არჩევნებამდე დარჩება. ამის შესახებ ნოდარ ჯავახიშვილმა ჟურნალისტებს დღეს განუცხადა.
"შემოწმების დაწყების დღიდან ისინი არაფერს არ სწავლობენ და არაფერს არ ამოწმებენ. მუშაობენ მხოლოდ მიმდინარე ოპერაციების წინასწარი შემოწმების რეჟიმში, რაც არ ჯდება ტერმინ შემოწმების ფარგლებში. არ მაქვს იმედი, რომ თუ საერთაშორისო ორგანიზაციების მხრიდან არ იქნება ზეწოლა ან თუ არ მოვიგებთ სასამართლო პროცესს, ეროვნული ბანკი ბანკ "ქართუს" არჩევნებამდე დატოვებს", - ამის შესახებ აღნიშნა ჯავახიშვილმა.
მისივე თქმით, ბანკი "ქართუ" გეგმავს, ეროვნული ბანკის წინააღმდეგ სასამართლოში სარჩელი შეიტანოს.
როგორც ჯავახიშვილმა აღნიშნა, ბანკი "ქართუ" მოითხოვს, სასამართლოს მხრიდან გაკეთდეს განმარტებები, რის საფუძველზე და კონკრეტულად რას ამოწმებს ეროვნული ბანკი ბანკ "ქართუში".