თვითმფრინავის ტექნიკური პრობლემის გამო, თბილისის საერთაშორისო აეროპორტმა თბილისი-სტამბულის რეისის განხორციელება ვერ შეძლო.
როგორც "ინტერპრესნიუსს" აეროპორტში განუცხადეს, სტამბულიდან ჩამოფრენილ ლაინერს, რომელიც კომპანია "პეგასუსის" კუთვნილებაა, ტექნიკური პრობლემა დაფრენის შემდეგ შეექმნა.
"ლაინერი დღეს დილით ჩამოფრინდა, ის ნორმალურად დაეშვა, თუმცა შემდეგ ტექნიკური პრობლემა შეექმნა, რის გამოც თვითმფრინავმა სტამბულის მიმართულებით, უკან გაფრენა ვერ შეძლო. ამის გამო თბილისი-სტამბულის რეისი, რომელიც დილით უნდა შესრულებულიყო, ვერ განხორციელდა", - აცხადებენ აეროპორტში.
მათივე ინფორმაციით, სტამბულიდან ახალი ლაინერი უკვე გამოფრინდა და დაგეგმილი რეისი თბილისიდან თურქეთის მიმართულებით რამდენიმე საათში შესრულდება.
რაც შეეხება ზოგადად აეროპორტის ფუნქციონირებას, როგორც პრესსამსახურში აცხადებენ, უამინდობას პრობლემები არ შეუქმნია და ყველა რეისი გეგმის მიხედვით ხორციელდება.