ნიკა გელაშვილის "ბოხუმმა" გერმანიის მეორე ბუნდესლიგის 22-ე ტურში ბერლინის "უნიონს" 4:2 სძლია. ნიკა პირველად მოხვდა ახალი გუნდის სასტარტო შემადგენლობაში და შეუცვლელადაც ითამაშა. მე-20 წუთზე მისი დარტყმული ძელს მოხვდა, ხოლო 61-ე წუთზე ნიკამ პენალტი მოიპოვა - ბერლინელი კრისტოფ მენცი ქართველის წინააღმდეგ წესის დარღვევისთვის გააძევეს კიდეც. გელაშვილმა მეოთხე გოლშიც მიიღო მონაწილეობა.

"ბოხუმმა" ორი გოლი გაიტანა პენალტით, ერთხელ კი 11-მეტრიანით დედაქალაქელებმაც იხეირეს. მიუხედავად იმისა, რომ არ გაუტანია, გელაშვილი აქტიური იყო და ცუდი მატჩი ნამდვილად არ ჩაუტარებია. ნიკას გუნდს 30 ქულა აქვს და მე-9 ადგილზეა. თურქეთში აკაკი ხუბუტიას გარეშე იმარჯვა "სამსუნსფორმა", რომელმაც სტუმრად აუტსაიდერი "ანკარაგიუჯიუ" 3:0 გაანადგურა და მართალია, ბოლოსწინა ადგილზე დარჩა, მაგრამ ამჯერად ქულებში განსხვავება მცირეა და არის შანსი, სამსუნელები გავარდნას გადაურჩნენ. ხუბუტია განაცხადშიც არ იყო. თითქმის გადაწყვეტილია, რომ ქართველი სეზონის ბოლოს დატოვებს თურქულ კლუბს.   ილია ნანობაშვილი