საქართველოს მართლმადიდებელი ეკლესია დღეს ყველიერის ხუთშაბათს, ღირსი შიო მღვიმელის ხსენების დღეს აღნიშნავს . ამასთან დაკავშირებით ტაძრებში სადღესასწაულო წირვა ჩატარდება. ამ დღეს განსაკუთრებით აღნიშნავენ შიო მღვიმის მამათა მონასტერში, სადაც წმინდა მამა განისვენებს.
წმინდა შიო მღვიმელი წარმოშობით ანტიოქიელი, ცამეტ ასურელ მამათაგან ერთერთი იყო, რომლებიც ღვთისმშობლის მოწოდებით საქართველოში მე-6 საუკუნეში შემოვიდნენ.
წმინდა შიო მღვიმელი წმინდა იოანე ზედაზნელის კურთხევით მცხეთის მახლობლად, სარკინეთის კლდეში დამკვიდრდა და იქ დაიწყო მოღვაწეობა. ის ადგილი იმ დროს მიუვალი, უწყლო, მხეცებით სავსე იყო. ღირს მამას საზრდელს ფრინველები უზიდავდნენ.
მოგვიანებით, ფარსმან მეფის დახმარებით, წმინდანმა ტაძრის აგება შეძლო და მონასტერიც შეიქმნა, სადაც ბერების რიცხვმა ორი ათასს მიაღწია. სიცოცხლის ბოლო 15 წელი კი წმინდა მამამ მის მიერ გათხრილ მღვიმეში მარხვითა და ლოცვით გაატარა.