ბოლო ხანებში პრესაში გავრცელდა ინფორმაცია იმის შესახებ, რომ ინგლისელი მსახიობი სიენა მილერი ორსულად არის. ოთხშაბათს ვარსკვლავმა ეს ხმები დაადასტურა, როცა ნიუ იორკში The Event Changing Face of Beauty-ის ცერემონიალზე წამოზრდილი მუცლით გამოჩნდა. მომავალ დედიკოს გრძელი შავი კაბა და მაღალქუსლიანი ფეხსაცმელი ეცვა. 30 წლის ვარსკვლავის პირმშოს მამა მსახიობი ტომ სტარიჯია, რომელსაც მილერი უკვე წელიწადია ხვდება. თავისი ახალი შეყვარებულის შესახებ მეგობრებს მან დეკემბერში ამცნო. თუ გავრცელებულ ხმებს დავუჯერებთ, წყვილი უკვე დანიშნულია. ცოტა ხნის წინ სიენას არათითზე მბრწყინავი ნიშნობის ბეჭედი შენიშნეს. პატარა, სავარაუდოდ, ქვეყანას ივლისში მოევლინება. შეგახსენებთ, რომ გასულ წელს საბოლოოდ დაესვა წერტილი სიენა მილერისა და ჯუდ ლოუს რომანს. მათ დიდხანს უყვარდათ ერთმანეთი, მაგრამ ეს ურთიერთობა ქორწინებით ვერ დაგვირგვინდა.