ლაგოდეხის სახელმწიფო ნაკრძალში მე-9 საუკუნის სამნავიანი ბაზილიკის ტიპის ეკლესია ნადგურდება. შემორჩენილია მხოლოდ შუა ნავის ჩრდილო კედელი, დასავლეთისა და სამხრეთის კედლების ნაწილები, აგრეთვე სამხრეთ-აღმოსავლეთის მცირე ეკლესიის მინაშენის ნანგრევები.

„მონასტერი მართლაც ცუდ მდგომარეობაშია, სახურავი მთლიანად ჩამონგრეული აქვს, შემორჩენილი კედლები კი დაბზარულია. მონასტერს სარეაბილიტაციო სამუშაოები ესაჭიროება. ლაგოდეხის რაიონში არსებული ყველა ეკლესიის მონაცემები, რომლებსაც რესტავრაცია სჭირდება, 2011 წელს კულტურული მემკვიდრეობის დაცვის ეროვნულ სააგენტოს გადავუგზავნეთ. წინასწარ ვერ გეტყვით სააგენტო ლაგოდეხში რომელი ეკლესიების სარესტავრაციო სამუშაოებს ჩაატარებს. ამ ინფორმაციას სააგენტო მომავალში შეგვატყობინებს", - განუცხადა კახეთის საინფორმაციო ცენტრს ლაგოდეხის მუნიციპალიტეტის გამგეობის კულტურის განყოფილების სპეციალისტმა აკაკი მჭედლიშვილმა.