სოლიდარობის აქციის ფარგლებში, არასამთავრობოთა კოალიცია "სამოქალაქო ერთობის" წევრებმა ბანკ "ქართუში" ანაბრები გახსნეს .
ანაბარის გასახსნელად რამდენიმე ათეული ახალგაზრდა დღეს ჭავჭავაძის გამზირზე მდებარე ბანკის სათაო ოფისში მივიდა. კოალიციის ახალგაზრდული ორგანიზაციის ხელმძღვანელის, მიხეილ მუმლაძის განცხადებით, ანაბარს დღეს მათ კოალიციაში შემავალი სტუდენტური ორგანიზაციების წარმომადგენლებიც გახსნიან და სავარაუდოდ, დღევანდელი სოლიდარობის აქციის მონაწილეთა რაოდენობა 100 მოანაბრემდე გაიზრდება.
როგორც ორგანიზაციის წევრები აცხადებენ, ანაბრების გახსნის გარდა, ისინი ბიძინა ივანიშვილის მიმართ სოლიდარობის გამოხატვას მისთვის მოქალაქეობის აღდგენის მოთხოვნით ხელმოწერების შეგროვებითაც ცდილობენ.
ახალგაზრდული ორგანიზაციის ხელმძღვანელის განცხადებით, "სამოქალაქო ერთობის" მიერ ბიძინა ივანიშვილის მხარდაჭერის მიზანი საქართველოში ჯანსაღი პოლიტიკური პროცესების განვითარებაა.
ბიზნესმენ ბიძინა ივანიშვილის საკუთრებაში არსებული ბანკ "ქართუს" მხარდამჭერი აქცია რამდენიმე კვირის წინ დაიწყო. სოლიდარობის ნიშნად პირველი ანაბარი პოეტმა დავით მაღრაძემ გახსნა. მას შემდეგ ბანკში ანაბარი რამდენიმე ათასმა ადამიანმა გახსნა.