ბიზნესომბუდსმენი გიორგი პერტაია ~ქართუ ბანკის~ გარშემო შექმნილ ვითარებაზე ინფორმაციას მხოლოდ მედიისგან იღებს.
როგორც გიორგი პერტაიამ ჟურნალისტებს განუცხადა, ბანკს თუ რაიმე პრობლემა აქვს, მას უნდა მიმართონ.
"ჩვენ უნდა გავიაროთ ამ პრობლემასთან დაკავშირებული დოკუმენტები და შემდეგ შეიძლება რაიმეს თქმა", – განაცხადა პერტაიამ და დასძინა, რომ აქამდე ყველა ინფორმაცია მხოლოდ პრესიდან აქვს მიღებული, რადგან მისთვის არავის მიუმართავს.
რაც შეეხება "სააღსრულებო წარმოებათა შესახებ" კანონში ცვლილებებს, რომლის მიხედვით, იპოთეკა-გირავნობით დატვირთული ქონების რეალიზაციისას, ვალდებულებების უზრუნველყოფის რიგითობაში ბანკი რიგ შემთხვევებში პირველი რიგის იპოთეკარს აღარ წარმოადგენს, პერტაია საერთაშორისო პრაქტიკის გაცნობის აუცილებლობაზე ამახვილებს ყურადღებას.
პერტაიას თქმით, ასეთი პრაქტიკა ბევრ ქვეყანაში არსებობს და თუ მას ვინმე არ ეთანხმება, შეუძლია პარლამენტს და ან ბიზნესომბუდსმენის ოფისს მიმართოს.
"ჩვენ შეგვიძლია ამაზე ვიმუშაოთ. თუ საბანკო სფეროში ამის პრობლემაა, ვიმუშავებთ, მაგრამ ერთი კონკრეტული ბიზნესმენის ლობირებაზე, ან კონკრეტული ბიზნესის დაცვაზე ორიენტირებული არა ვართ", – განაცხადა გიორგი პერტაიამ.