რუსეთის დიდი თეატრის სოლისტს ზურაბ სოტკილავას თეატრი არ დაუტოვებია,- ამის შესახებ "ინტერპრესნიუსს" მომღერლის შვილმა, ქეთევან სოტკილავამ განუცხადა .
ქეთევან სოტკილავას თქმით, სოლისტს თეატრის ხელმძღვანელობასთან არანაირი პრობლემა არ აქვს.
"თეატრის მიმართ მისი კრიტიკა მხოლოდ მხატვრულ მხარეს ეხება და ამის უფლებაც აქვს, რადგან 40 წელია, ამ თეატრში მუშაობს და გული შესტკივა მასზე. თუმცა, ამ კრიტიკული განცხადებების მიუხედავად ზურაბ სოტკილავას ხელმძღვანელობასთან არანაირი პრობლემა არ აქვს. ამას ისიც ადასტურებს, რომ დიდი თეატრის გეგმაში მომავალი წლის 11 მაისისთვის ზურაბ სოტკილავას შემოქმედებითი საღამოა ჩანიშნული და ეს საღამო ძირითად სცენაზე გაიმართება. ზურაბ სოტკილავას შემოქმედებითი საღამოს ჩატარების წინადადება თბილისიდანაც კი არ მიუღია. იგი აგრძელებს თეარტში კონტრაქტით მუშაობას", - განაცხადა ქეთევან სოტკილავამ.

მან ასევე უარყო რუსული პრესით გავრცელებული ინფორმაცია, რომ ზურაბ სოტკილავა არ მიიწვიეს რეკონსტრუქციის შემდეგ დიდი თეატრის გახსნის გალა-კონცერტზე. ქეთევან სოტკილავას განცხადებით, სოლისტი კონცერტს დაესწრო.
ინფორმაცია ზურაბ სოტკილავას მიერ თეატრის დატოვების შესახებ რუსული მედიით გავრცელდა.