თბილისში პრესის გამავრცელებელი ჯიხურების აღება გრძელდება. კიდევ ერთი ჯიხური ბუკიას ბაღში აიღეს.
ბუკიას ბაღში პრესის გამავრცელებელ ჯიხურს ინდმეწარმე ნუნუ ლაბაძე 12 წელია, ფლობდა. 2007 წლიდან კი, მას ჯიხურის ტერიტორიის არენდით მართვის უფლება უვადოდ ჰქონდა. არებული ინფორმაციით, ნანა ლაბაძის ჯიხურის ადგილზე გამოცხადებული აუქციონი ჩაიშალა და, შესაბამისად, ამ აუქციონში დამარცხებულად არ ითვლება. ამის მიუხედავად, ჯიხურის ასაღებად ადგილზე წუხელ ქალაქის ზედამხედველობის სამსახურის წარმომადგენლები მივიდნენ და ჯიხური აიღეს.
როგორც ნუნუ ლაბაძემ შემთხვევის ადგილზე მისულ ჟურნალისტებს განუცხადა, ბოლო 10 დღის განმავლობაში თბილისის მერიიდან აფრთხილებდნენ, რომ ჯიხური უნდა აეღო. თუმცა, ნუნუ ლაბაძისთვის უცნობია, რა მოტივით.
"აცხადებდნენ, რომ ძველი ნებართვა გაუქმებულია და საჭიროა ახალის აღება. ნებართვა მერიის მიერვე იყო გაცემული. თუ რაიმეს არაკანონიერად ვფლობდი, უნდა ეთქვათ. მოტივი უნდა დაესაბუთებინათ", _ აცხადებს პრესის ჯიხურის მეპატრონე.
შემთხვევის ადგილზე წუხელ "პრესის ასოციაციის" წევრი ელისო ჩაფიძეც იმყოფებოდა. როგორც ელისო ჩაფიძემ განაცხადა, საქართველოს პრეზიდენტი ამის გამო ჟურნალისტებისგან პრეზიდენტის რეზიდენციასთან აქციას მიიღებს.
"აქციის დროს დავანახვებთ მთელს მსოფლიოს, როგორ ებრძვის მიხეილ სააკაშვილი პრესას", _ განაცხადა ჩაფიძემ.
ამ დროისთვის არსებული მონაცემებით, თბილისში უკვე აღებულია ან უნდა აიღონ პრესის გამავრცელებელი სხვადასხვა კომპანიის 20-მდე ჯიხური.
სააგენტოები ჯიხურების ლიკვიდაციის შესახებ ინფორმაციას თბილისის მერიის ზედამხედველობის სამსახურისგან იღებენ, რის შემდეგაც ჯიხურები ორ დღეში უნდა აიღონ.
ვიდეო