სასამართლო სარჩელის საფუძველზე დაყადაღებული საბანკო ანგარიშის გამო, მუსიკალური ტელეარხი "პირველი სტერეო" მუშაობას დროებით კერძო ინვესტიციების დახმარებით გააგრძელებს .
როგორც "ინტერპრესნიუსს" "პირველი სტერეოს" საზოგადოებასთან ურთიერთობის სამსახურის უფროსმა კობა ბრეგვაძემ განუცხადა, ტელეკომპანიის საბანკო ანგარიში დაყადაღებულია, რაც "ტელეცენტრის" საჩივრის საფუძველზე მოხდა.
მისი განმარტებით, ტელეცენტრი მომსახურებისთვის "სტერეოს" 180 ათას ლარს სთხოვს, თუმცა, როგორც ბრეგვაძე აცხადებს, ტელეკომპანიას აღნიშნული რაოდენობის დავალიანება არ გააჩნია.
"2008 წლის საომარი ვითარების დროს ტელეცენტრს თუ დაუზიანდა ტექნიკა, ჩვენი ტექნიკაც დაზიანდა. მათ თუ შეეხო ფორსმაჟორული სიტუაცია, ჩვენც უნდა შეგვეხოს. ტელეცენტრის მიერ მოთხოვნილი 180 ათასი ლარი რეალურ დავალიანებას რამდენჯერმე აღემატება. ისინი სხვანაირად ითვლიან ხარჯებს",-განაცხადა კობა ბრეგვაძემ.
მისივე ინფორმაციით, ტელეკომპანია "პირველი სტერეოს" დამფუძნებლებმა "ტელეცენტრის" წარმომადგენლებთან გარკვეულ შეთანხმებას მიაღწიეს და მაუწყებლობა კერძო ინვესტიციების საშუალებით გაგრძელდება.