საპარლამენტო უმრავლესობის ერთ-ერთი ლიდერის, ნუგზარ წიკლაურის მტკიცებით, კერძო მედიის საქმიანობაში ჩარევა დემოკრატიაზე უარის თქმას ნიშნავს და ქართული სახელმწიფო ამას არ იზამს .
ამის შესახებ წიკლაურმა ჟურნალისტებს "Human Rights Watch"-ის დასკვნის კომენტირებისას განუცხადა, სადაც ქართული მედია გაკრიტიკებულია. მისი თქმით, მედიის კრიტიკულად შეფასება საქართველოში საკამათო თემაა.
დეპუტატმა აღნიშნა, რომ თვითმმართველობის არჩევნების დროს მრავალრიცხოვანი მონიტორინგის ჯგუფები მუშაობდა და მაშინ საზოგადოებრივ მაუწყებელზე, რომელიც არ არის კერძო მფლობელობაში, ითქვა, რომ არჩევნებში ყველა მონაწილისთვის თანაბარი პირობები იყო შექმნილი, რათა მოსახლებისთვის თავისი საარჩევნო პროგრამა გაეცნოთ.
რაც შეეხება ბეჭდურ მედიას, წიკლაურის განცხადებით, ბეჭდური მედიის უდიდესი ნაწილი ძალიან კრიტიკულად არის განწყობილი, სახელმწიფოს კი არ შეუძლია მათ საქმიანობაში ჩარევა და მათთვის მითითება, თუ რა საკითხები უნდა წამოსწიონ წინ და რა არა.
ამასთან, წიკლაური ამბობს, რომ მისი ინფორმაციით, ახლა ძალიან დიდი რაოდენობით ფულიც და ძალისხმევაც არის მიმართული კონკრეტული პოლიტიკური პარტიების მხრიდან, რომ სხვადასხვა სატელევიზიო არხებზე მოხდეს კონკრეტული პოლიტიკური პარტიის ინტერესების გატარება. ამიტომ, წიკლაური ფიქრობს, რომ საქართველოშიც შეიქმნება ისეთი ვითარება, რომ პოლიტიკური პარტიების მოსაზრებები ადეკვატურად იქნება გადმოცემული ტელეეთერით. "კერძო გაზეთების, ტელევიზიების საქმიანობაში ჩარევა არის პირველი ნიშანი იმისა, რომ უარი ვთქვათ დემოკრატიაზე. ქართული სახელმწიფო ამას არ იზამს", – დასძინა ნუგზარ წიკლაურმა.