საქალაქო სასამართლოდან ლალი მოროშკინა რამდენიმე წუთის წინ ე.წ. მოდულის შენობაში გადაიყვანეს .
მოდულის შენობასთან შეკრებილები არიან ლალი მოროშკინას ოჯახის წევრები და მისი მეგობრები. აქვე იმყოფება ლალი მოროშკინას ადვოკატი თამილა გოჩელაშვილი, რომელიც ცდილობს, რომ შევიდეს შენობაში და შეხვდეს მოროშკინას, თუმცა ადვოკატი ჯერ მოდულის შენობაში შესვლას ვერ ახერხებს.
როგორც მოროშკინას ადვოკატი აცხადებს, ამ ეტაპზე არ აქვს რაიმე ტიპის ინფორმაციის გაცემის უფლება, უნდა შეხვდეს მოროშკინას და მხოლოდ ამის შემდეგ გააკეთებს კომენტარს.
ასევე, ლალი მოროშკინას მეგობრები ჟურნალისტებთან საუბარში აცხადებენ, რომ სასამართლო პროცესი, რომელიც საქალაქო სასამართლოში გაიმართა, დარღვევებით მიმდინარეობდა, რადგან ადვოკატს არ ჰქონდა პროცესზე დასწრების უფლება.
დღეს თბილისის საქალაქო სასამართლომ ადმინისტრაციულ სამართალდართვევათა 166-ე მუხლით ლალი მოროშკინას 15-დღიანი პატიმრობა შეუფარდა. სასამართლომ აღნიშნული გადაწყვეტილება "ნანუკას შოუს" საახალწლო გადაცემის ჩაწერისას, ლალი მოროშკინასა და გაზეთ "პრაიმ ტაიმის" დამფუძნებელსა და მთავარ რედაქტორ თაკო ფხაკაძეს შორის მომხდარ ინციდენტთან დაკავშირებით მიიღო.