ალუბლის ხის ნაყოფი, ფოთლები, ყუნწები, ქერქი - სამკურნალოა. მისი კურკის გულსაც კი იყენებენ ხალხურ მედიცინაში. კურკის გული არ იჭმევა, მაგრამ, თუ გახეხავთ და კომპრესის სახით პოდაგრაზე დაიდებთ, გიშველით. ვისაც კოლიტი აქვს, ბევრი ალუბალი უნდა ჭამოს. ის კარგად მოქმედებს ცენტრალურ ნერვულ სისტემაზე, ნევრასთენიის, დეპრესიისა და სხვა ნევრო-ფსიქიკურ დაავადებებზე. იმას, ვისაც სკლეროზი აწუხებს, სახალხო მკურნალები ურჩევენ, დღეში 1 კგ ალუბალი მიიღოს და 1,5 ლიტრი რძე დააყოლოს. ალუბლის ხის ქერქის ნახარში შველის რევმატიზმსა და კრუნჩხვებს. 1 სუფრის კოვზ დაქუცმაცებულ ქერქს ასხამენ 1 ჩაის ჭიქა ცივ წყალს, ადუღებენ, 10-15 წუთი გააჩერებენ, გაწურავენ და სვამენ დღეში 1-2 ჭიქას. ალუბლის ფოთლები გულის დაავადებებს შველის. ის შეიცავს კუმარინს - ნივთიერებას, რომელიც ამცირებს სისხლის შედედებას და ეწინააღმდეგება თრომბის წარმოქმნას. ფოთლების ნახარში გამოიყენება გულის იშემიური დაავადებების დროს. ალუბლის ყუნწებს ძლიერი შარდმდენი მოქმედების უნარი აქვს. ჰიპერტონიის დროს 2 ჩაის კოვზ დაქუცმაცებულ მასას დაასხით 1 ჩაის ჭიქა წყალი, მიიყვანეთ ადუღებამდე და დალიეთ 1 სუფრის კოვზი სამ-ოთხჯერ დღეში.