აშშ-ს ნიუ-ჯერსის ქალაქ ნიუარკში, ამერიკელი მომღერლის უიტნი ჰიუსტონის დაკრძალვის ცერემონია გაიმართა. ჰიუსტონი ნიუარკის მახლობლად, ქალაქ ვესფილდში, მამის გვერდით დაკრძალეს.
2 დღის განმავლობაში ნიუარკის ერთ-ერთ ბაპტისტურ ტაძარში ჰიუსტონის ნეშტი იყო დასვენებული, სადაც ათასობით ადამიანი მივიდა ცნობილი მომღერლის ხსოვნის პატივსაცემად.
დაკრძალვის ცერემონიას 1500-მდე ადამიანი ესწრებოდა. ცერემონიას მსახიობი კევინ კოსტნერი უძღვებოდა.
ცნობილი მომღერლის გარდაცვალებასთან დაკავშირებით, ქალაქ ნიუარკში ყველა დროშა დაშვებული იყო.
უიტნი ჰიუსტონის ხსოვნის საპატივსაცემოდ, ცნობილმა ამერიკელმა მომღერლებმა სიმღერები შეასრულეს.
უიტნი ჰიუსტონმა მომღერლის კარიერა ნიუარკის ეკლესიის გუნდში დაიწყო. შემდეგ სოლო კარიერა განაგრძო და მსოფლიო აღიარება სიმღერებთან ერთად, კინოფილმ "პირადი მცველის" ეკრანებზე გამოსვლამ მოუტანა, სადაც მას პარტნიორობას კევინ კოსტნერი უწევდა.
უიტნი ჰიუსტონი 48 წლის ასაკში, 12 თებერვალს გარდაიცვალა. მომღერლის ცხედარი ლოს-ანჯელესში, სასტუმრო "ბევერლი ჰილტონის" ნომერში აღმოაჩინეს.
პოლიციის წარმომადგენელთა განცხადებით, ცხედარს ძალადობის კვალი არ ეტყობოდა. გავრცელებული ინფორმაციით, ვარსკვლავს ნარკოტიკებთან დაკავშირებული პრობლემები ჰქონდა. მომღერალს ფილტვებში წყალი აღმოუჩინეს.