მუხრანის, იგივე მეიდნის კარი, ფეოდალური ხანის თბილისის გალავნის ჩრდილოეთ კედელში მოქცეული კარიბჭე გახლდათ, რომელიც დღევანდელი ბარათაშვილისა და ჩახრუხაძის ქუჩების გადაკვეთაზე მდებარეობდა. დღეს ეს ადგილი მინიშნებულია ნახევრად ამოყვანილი თაღებით. ვახუშტი მას „მეიდნის კარის“ სახელწოდებით იხსენიებს. აქედან ხიდზე გავლით გზა მიდიოდა მოედანზე, სადაც ასპარეზი მდებარეობდა (დღევანდელი გიორგი ლეონიძის ბაღის ტერიტორია). შემდგომში, როდესაც კარიბჭის სიახლოვეს მუხრანბატონის სასახლე აშენდა, ქალაქის კარს მუხრანის სახელი შეარქვეს. მუხრანის კარის ღერძზე ავანანთხევზე მცირე ხიდი იყო გადებული. აქედან დაწყებული გზა გადიოდა ვანქის უბანში, სომხურ სასაფლაოზე, ახლანდელი ორბელიანის მოედნის ტერიტორიასა და „მეიდანზე“, სადაც ასპარეზი (ყაბახი) იყო, უერთდებოდა დიღმის კართან დაწყებულ გზას, რომელიც საბოლოოდ ჩრდილოეთისკენ - დიღომსა და მცხეთისკენ მიმავალ გზას ერწყმოდა.